Nagsampa si Vic Sotto ng 19 kaso ng cyberlibel laban sa direktor na si Darryl Yap matapos ilabas ang teaser ng The Rapists of Pepsi Paloma. Ang teaser ay nagbanggit ng pangalan ni Sotto kaugnay ng yumaong aktres na si Pepsi Paloma, na nagdulot ng kontrobersya.
Kinumpirma ng abogado ni Sotto na si Atty. Enrique Dela Cruz na isinampa ang mga kaso sa Muntinlupa Regional Trial Court (RTC). Dumating si Sotto sa korte kasama ang kanyang asawa na si Pauleen Luna.
Sa teaser, tinanong ang aktres na gumaganap bilang Pepsi Paloma kung siya ba ay ni-rape ni Vic Sotto, at tumugon ito ng “oo.” Dahil dito, napagpasyahan ni Sotto na lumabas at magsampa ng kaso.
Sa isang panayam, ipinaliwanag ni Sotto ang kanyang hakbang:
“Maraming nagtatanong sa akin, ‘Ano reaction mo?’ Ito na po yun. Ito na po yung reaction ko. Sabi ko nga eh, ito’y walang personalan ito, I just trust in our justice system. Ako’y laban sa mga irresponsableng tao lalo na pagdating sa social media.”
Binatikos din ni Sotto ang production team dahil sa hindi paghingi ng pahintulot.
“Walang kumunsulta, walang nagpaalam, walang consent,” aniya.
Gayunpaman, nilinaw niya na wala siyang galit sa mga aktor na bahagi ng proyekto.
“Wala, trabaho lang ‘yon, no problem,” dagdag niya.
Ibinahagi rin ni Sotto na suportado siya ng kanyang pamilya, mga kaibigan, at mga tagasuporta sa kanyang laban para sa hustisya. Nang tanungin para sa mensahe kay Yap, sagot niya: “Happy New Year.”
Matapos ang pagsasampa ng kaso, agad na ipinag-utos ng Muntinlupa RTC ang pagtanggal ng teaser.
Ayon kay Yap, ang pelikula ay nakatuon umano sa kuwento ni Pepsi Paloma at hindi tungkol sa Tito Sotto, Vic Sotto, at Joey de Leon (TVJ). Ngunit hindi niya itinanggi na kasama ang TVJ sa pelikula. Sa kasalukuyan, wala pang tugon mula kay Yap ukol sa usapin.
